Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Kei konei koe:

Tirohia mā te reo: Māori | English

Me pēhea te whakaatu i te haka?

Ka kōrero a Te Keepa Stirling mō te haka, ā, me pēhea hoki e taea ai e te ākonga te whakamahi i te wairua o ō tātou tīpuna ki te whakapakari i tāna whakaatu.

Ngā tuhituhinga

Ko te haka, nāu ake. Ko tāku ki ngā tauira nei kaua e wareware ko koe te tinana, kaua e wareware ko ō whatu kei roto i tō māhunga, ko tō arero kei roto i a koe. Mā ērā kare ā-roto kei roto i a koe e whakawhātero mai i tō arero. Kaua e whātero noa iho nō te mea kāre koe i te mārama ki ngā kupu ka whakakīia e koe tērā wāhanga ka pēnei ai te hunga mātaki mai ana i a koe, kei te whātero koe i tō arero kia puta ake te tikanga o te kupu. Ko tāku, kāo. Whakamahia ngā kupu, ko ō ringa me tō tinana hei hāpai i ngā kupu kei te whakpuakitia e koe. Ki te kore he kupu, kāore he haka, ka noho tū noa iho koe ... E ngā tauira o roto i ngā kapa haka o tēnā kura, o tēnā kura huri noa i te motu, ko te kapa haka te wairua o ngā mātua tūpuna e rere nei i te rā nei. E rere nei i runga i a mātou i tēnei wā. Ina ka hiahia koutou kia piri mai tēnā wairua, rere atu ngā ringa ki te rangi. Anei whakatōhia te wairua o ō koutou mātua tūpuna ki roto i a koutou. Tōia ki uta, takahia te whenua, mahia ngā mahi, ka noho ko rātou ētahi tuara mō koutou hei kaitiaki. Ira ngā āhuatanga, ngā piki ngā heke, ko wai kei mua, kei muri kei waenganui i a koutou ko te wairua o ō koutou mātua tūpuna. Kia kaua koutou e wareware, he mōrehu koutou. Nā ngā mātua tūpuna koutou i whakatō ki te ao nei. He koha wairua koutou nā te ao wairua. Ka tiritiria, ka poupoua ki roto i ō koutou mātua, ka hāngai ko koe e te tauira e mahi nei i te kapa haka. Kia rangatira, tū rangatira, tū māia, kia motuhake tā koutou tū. Nō te mea ko tō koutou reanga, e mahi nei i te kapa haka ko ēnei tohutohu ki a koutou āpōpō ka noho hei whakaaturanga mō tō koutou reanga e tipu ake nei āpōpō, he ātaahua te mutunga nō te mea ko koutou te waha kōrero mō rātou, te iwi o āpōpō. Tēnā koutou, tēnā koutou, ka mau te wehi taiohi mai, kia ora koutou.


Footer: