Te whanaketanga o te haka mai i tērā o neherā ki tō nāianei

Ngā tuhituhinga

I a au e kōrero ana ki taku tuakana, ko ia hoki i haere i te Rua Tekau Mā ... te whawhai nui o te ao i taea ia ki reira. Ka kōrero ia ki a mātou, o ngā haka i hakaina e rātou, ko ngā haka i akona o te wā e neke ana rātou i runga i te koraha, ko ngā haka i hakaina e rātou. Ētahi o ngā haka i puta mai mōhio i a rātou e hīkoi ana. Anā, i a rātou e hīkoi ana ētahi wā e whā haora kē e haere ana i roto i tērā kātahi ka hangaia te haka o taua wā, he haka nā Tūmatauenga. Rongo ana rātou i te whio kāre anō kia tau te kariri rā ki runga o Papatūānuku, kua mōhio kē rātou he aha taua āhuatanga. Anā, ko tērā te wā o te pahū korara. I roto i te pahū korara, ka mate katoa ngā tāngata e tū ana ki runga. Rongo ana rātou, ‘pore ki raro Papatūānuku’. Koirā te tohu ahakoa kei hea koe, me taka koe ki raro, anā, ka whāroro koe ki runga o Papatūānuku nō te mea i te kore te pātanga o taua kariri ki te whenua ka pahū. Anā, ko ērā tētahi o ngā āhuatanga nā reira ō rātou haka i aua wā rā he mataku, he kareureu, he kariri whiowhio, auē, auē, kia tūpato, kia tūpato. Koirā ngā kōrero i a rātou e haere ana ka kōrero mai ki a au. Ka aroha au ki a rātou nō te mea ko tā rātou haka he haka tiaki, he haka whakatūpato i tā rātou haerenga i roto i te ope taua. Koirā te rautaki o ō tāua mātua tūpuna kia mau, kia maumahara tātou. Ko te tū ki te haka taparahi, te peruperu, ērā haka katoa he haka whakapakari te tinana. Kia aha ai? Kia tae mai te hoariri, kei te mōhio te ope taua me pēhea te kawe i tērā i runga i te atamira, te rerekētanga o tēnei wā he whakapaipai noa iho. He pai tērā engari me hoki tonu tātou ki te kawenga o ō tātou mātua tūpuna kī mai ki a tātou, “E hoa ko te haka he haka taua.” Engari ko te rerekētanga o tēnei rā ki ērā rā, kua ngaro atu te ia wairua me te whakamataku tangata i roto i ngā haka. Kei te āki kē tātou i ngā nawe e puta ake ana i roto i ngā āhuatanga tōrangapū. I reira kei te whawhai kupu kē tātou ki te kāwana, ērā atu āhuatanga i ngā hē. Engari mehemea ka tika tā tātou kawe i taua haka rā, i runga i te kawenga Māori o ō tāua mātua tūpuna ko te wairua kei roto i taua haka ka pērā tonu.