Te whakaheke i te Rīpeka Wikitōria a Haane Manahi

Ngā tuhituhinga

I te Pakanga o Takrouna tino kitea ai te kaha o te kakari, te toa takitahi o ngā hōia, ka waiho ai hei mea whakawehiwehi mai me ērā katoa o te ope matua. Nō muri i te pakanga i tūtohua ai a Manahi ki te Rīpeka o Wikitōria.

Anei rā ngā mērara katoa o te rōpū o Tūmatauenga, ā, ko tēnei nā te Rīpeka Wikitōria – e toru ngā wiki mai i te whiwhi o Ngarimu i tēnei tohu te Rīpeka Wikitōria e tonoa mai e ngā rangatira o tō māua pāpā a Haane ki tēnei mērara. Engari ka whiwhi kē ia i tēnei mērara ko te DCM.

Kāre he whakamārama nā te aha i kore ai, engari tērā te whakaaro, he kore pīrangi nō ngā āpiha o Ingarangi ki te hoatu mētara ki ngā iwi here ki te Karauna, me te whakapae hoki ka whakaitia te mana o taua mētara i te whakawhiwhinga a te Māori.

Maumahara au i te wā i ora ai tōku matua, toku pāpā, “E Dad, pēhea ōu whakaaro e pā ana ki te V.C.” “E, hei aha tērā, hei aha te V.C., waihotia. Tokomaha ngā tāngata i roto i te Rua Tekau Mā Waru e taea nei ki tēnei tohu Pākehā. Tokomaha hoki o rātou i hinga i te parekura,” koinā tana whakaaro, “hei aha te V.C., waihotia”, engari he tangata tino hūmārie, “hei aha te V.C.”. Ko te mea nui ko tana whānau, ko tana mahi hī ika, ko tana wahine, koirā ngā mea nui ki tōku matua, ki tōku pāpā. Ko te V.C. hei aha, ehara i te mea nui.

Anei rā ngā mērara o tō māua pāpā a Haane e piri nei kei te pakitara, kei te pakitara rā. I hoki mai ērā mērara i Waiouru ki te kāinga nei, ki te noho i roto i te RSA, anā ko te mērara kei waenganui kei te taha o te pikitia ko te DCM.

I te nanawe tonu te aroha me te mamae o ētahi o Te Arawa iwi i ngā mahi whakaiti a Ingarangi ki runga i a rātou. Ka puta te tono a te iwi me whakanui i te aumangea o Manahi. Nā, ka whakatūria te komiti Rīpeka Wikitōria hei whai i te take ki te whakarangatira i a Manahi ki te tohu ikeike mō ōna mahi i te Pakanga Nui o te Ao Tuarua.