Te whakahōnore i a Haane Manahi – mō te Atua, te kākahu ahurewa

Ngā tuhituhinga

Hōmaingia e te Kuini tētahi hoari, ā, ko te mea tuarua ko tētahi whakaahua o te Kuini me tētahi kōrero e pā ana ki te iwi o Ngāti Whakaue, ki Te Arawa whānui o ngā mahinga o taua kaumātua rā a Haane Manahi, ā, ko te mea tuatoru ko te kākahu kei muri i a au nei. E toru ngā tino taonga ka kitea nei e koe. Ko te mea kei tērā taha ko te rīpeka a te Karaiti, nā te mea hoki he tohu whakamaharatanga ki te Atua Matua, ki te Atua Tama, ki te Atua Wairua Tapu. Nā, ko te mea kei waenganui e kitea ana ko te whakairo mō te Kuini o Ingarangi. Nā, kei tēnei taha kē ngā aruhe o Aotearoa nei. Engari kua mahia mai hei tohu maharatanga ki ngā wā o mua rā, o neherā, te wā o te hokinga mai o ngā toa i pakanga i ngā pakanga o mua, o te ao o neherā raka, ka maungia i te tino toa o taua mea rā e kīia rā he laurel i runga i tōna matenga. Nā, koia tēnā, engari ko ngā putiputi, ko ngā rau rā he rau aruhe. Nā, ka tīmata mai anō te kōrero ko te Atua, ko te Kīngi, ko te whenua. For God, for King and for country. Anā, kei ia taha koia kei te kite koe i ngā poutama, ā, e mōhiotia nei e mātou e te Māori he wāhi hei kake ki te rangi. Kei runga ake i ngā mea e toru rā, me ngā poutama rā ko ngā whetū e tiaho mai rā, ā, ahakoa ōrite ana te āhua o aua whetū rā ki te rīpeka o te Karaiti, ā, koia tēnā.