Mahi whakaako, ako hoki

I te tuatahi he kōwae ako tīmatanga, ā, ka taea e te kaiako te urutau mō te akoranga ahakoa te taumata. Ka āhei te kaiako te whakamahi i Kia Mau mō te tau kotahi anake, hei wāhanga o te hōtaka mahi ako mō te toru tau rānei.

Mō ia taumata kua tuhia he kōwae ako tauwhāiti e arotau ana ki ngā whāinga paetae o taua taumata. Ka arotahi te taumata 6 ki te tōkeke pāpori me te kaiārahitanga; te taumata 7 ki te tōkeke pāpori me te pōuritanga; ā, ka hāngai te taumata 8 ki te wairuatanga.

I te tīmatanga o ia kōwae ako he whakataukī, me ngā hononga ki te Tikanga ā-Iwi, ngā ariā, me te arotahi o te ako e whai ana.
 
He mea tino nui te huarahi pakirehua pāpori i te hoahoa o te mahere whakaako. Ko te tūmanako ka matapaki te pouako me ngā ākonga i ngā paearu angitu i mua i te tīmatanga o ngā akoranga. Ka taea ēnei paearu te urutau kia rite ai ki ngā hiahia me ngā kaingākautanga o ngā ākonga. Mō te āhuatanga o te pakirehua pāpori, mēnā ka mahi tahi te pouako me ngā ākonga hei whakawhanake i ngā paearu angitu, ko te painga atu tērā.

Kei roto i ia kōwae ako he mahi hei whakamahinga mā te pouako ki te whakawhanake i te māramatanga ariā. He whakaaro noa iho ēnei – ka taea te urutau hei whakaea i ngā hiahia o ngā ākonga me te hapori.

Hei tāpiritanga mō ngā mahi i te rauemi nei, kua tuhia tētahi atu rārangi mahi ka taea pea e koe te whakawhānui atu. Pāwhiria ki konei mō ērā atu mahi anō.