He whakaaro mō ngā mahi e pā ana ki te ariā o te pōuritanga

Mā ngā ākonga e mātakitaki te waiata ‘E Pari Rā’ me ōna uiuitanga i te whakaata. (Pāwhiria ngā hononga e whai ake nei ki te mātakitaki i ngā whakaata 'Te whakaaturanga o te waiata E Pari Rā' e whakaatu ana i ētahi o te whānau e waiata ana i tēnei waiata; 'Nā wai i tuhi E Pari Rā, he aha ai hoki?' e matapaki ai a Tama Huata i te kōrero o te waiata, me te take ka waiatatia hei waiata poroporoaki; 'Te whakamahi hītoru hei tito i E Pari Rā' mō tā Tama Huata whakamārama he aha a Paraire Tomoana i kōwhiri ai i te mita hītoru, me 'Ngā āhua pohewa whakameremere i E Pari Rā' e matapakina ai te whakaahua o te timu me te pari o te tai hei whakapuaki i te aroha i waenga i te tama me te whaea.)
Te whakaaturanga o te waiata E Pari Rā
Nā wai i tuhi E Pari Rā, he aha ai hoki?
Te whakamahi hītoru hei tito i E Pari Rā
Ngā āhua pohewa whakameremere i E Pari Rā

Mā te pouako e whakamārama ko ‘E Pari Rā’ tētahi waiata aroha i titoa e Paraire Tomoana, he rangatira nō Ngāti Kahungunu me Ngāi Te Whatuiāpiti i te wā o te Pakanga Tuatahi o te Ao. Ka whakaatu te waiata i te aroha o te whaea ki tana tama, ki a Whakatomo Ellison (nō Ngāti Kahungunu tōna whaea, nō Kāi Tahu tōna pāpā), i tōna matenga i te Pakanga Tuatahi o te Ao. Ka whakaatu a Tomoana i te paringa o te tai. Ko te taenga mai o ngā ngaru ki uta, te taenga mai o te aroha o te tama ki tōna whaea. I te wehenga o te tai ka haria te aroha o te whaea ki tana tama. Ka hāngai tonu te kaupapa o tēnei waiata ki te Pakanga Tuarua o te Ao, nā te mea rite tonu ngā kare ā-roto o te mokemoke me te pōuri.

Mā te pouako e whakarite kia āta whai whakaaro ngā ākonga ki ngā āhuatanga o te ora i te wā o te pakanga. Mā te pouako e pātai pēnei:

• I pēhea te papātanga o te Pakanga Tuarua o te Ao ki te iwi Māori? Hei tauira, te ngaronga o te oranga tinana, oranga hinengaro, oranga aronganui o ngā hōia; te iti haerenga o ngā tāne Māori whakatauira whanonga i te hapori; e mahi ana ngā wāhine i ngā mahi tāne; te roroku o te whakawhitinga mōhiotanga ki te whakatipuranga hou; ngā kī taurangi kāore i tutuki (hei tauira, kāore i tukuna he wāhanga whenua ki ngā Māori i tā rātou hokinga mai), te aha, te aha.
• I pēhea te pāhekohekotanga o ngā hōia Māori ki ngā iwi o whenua kē, ina koa ki ngā Itāriana? Hei tauira te whakawhiti/tiritiri o ngā ahurea i a rātou e manaakitia ana e ngā whānau Itāriana; te tiritiri i ngā waiata, haka, me ngā kanikani; te tapa tamariki ki ngā ingoa wāhi o Itāria; ngā whakamaharatanga ki te Hokowhitu-a-Tū ki Itāria; ngā kai me te whakawhitinga o ngā tohutao; ngā kōrero mō te Hokowhitu-a-Tū nā ngā Itāriana; te waiata i ngā waiata o Itāria e ngā hōia Māori i ēnei rā.

Ka wehea ngā ākonga ki ngā rōpū e rima. Ka hoatu ki ia rōpū tētahi reta i tuhia i te wā o te Pakanga Tuarua. (Pāwhiria ngā hononga e whai ake nei mō ngā tauira reta e wātea tuihono ana i te pae tukutuku 28th Māori Battalion.)

Reta 1: Nā Ben Rata
Reta 2: Nā Henare Ngata
Reta 3: Nā Reverend Wharetini

Ka tātari ngā ākonga i te tikanga tuhi o te reta me te reo i whakamahia.

Mā ngā ākonga e tuhi ā rātou ake reta pakanga e hāngai ana ki tētahi o ngā tirohanga e whai nei. Ānei ngā tirohanga pea: tētahi hōia, matua, hoa rangatira/wahine, teina/tuakana/tuahine me tētahi tipuna. Me tuhi te ākonga i te rā me te wāhi e hāngai ana ki te Pakanga Tuarua o te Ao, i ngā mahi o te rā, i ngā kare ā-roto pērā i te mataku, te aroha, te mokemoke, te pāpōuri, te whakaongaonga, te aha, te aha.

Ngā rauemi whai pānga

• Ngā whakaata kei tēnei rauemi.
• He wāhi pepa nui me ngā pene whītau mā ngā ākonga hei tuhi whakaaro.
• He pepa mō te tuhi reta.
• He tauira reta i tuhia i te Pakanga Nui Tuarua.

He mahi whakawhānui pea
Mā ngā rōpū ākonga e whakamahi ngā kupu i te reta hei tito waiata aroha e whakaatu ana i te mokemoke me te pōuri. Me tuhi e ngā ākonga kia rua ngā whiti me te kōrihi i te itinga rawa. Me whiriwhiri hoki me pēhea te waiata i tēnei me ngā nekehanga ā-ringa, ā-tinana hoki hei whakarei ake i ngā kupu.