Te Pakanga o Takrouna

Ngā tuhituhinga

Ko Haane te Rauawa Manahi tētahi o ngā kikopuku nō te iwi o Te Arawa. I te tīmatanga o te Pakanga Tuarua, ka haere a Manahi ki te whawhai hei hōia i roto i te rōpū Rua Tekau mā Waru.

Ka huri nei ngā whakaaro ki te wā i pakanga ai taku matua a Haane i te wāhi i mōhiotia nei ko Takrouna, i Tunisia. I taua wā ka huihui nei ngā mema o te Rua Tekau Mā Waru kei te pūtake o te hiwi a Takrouna, kei runga ake i taua puke nei ngā Tiamana, ngā Itāriana e whā rau pea rātou kei runga ake i te puke, ka whakaaro rātou kei raro kia horo i te puke.

He mea whakahau nei kia pāhoro, mau rawa i a rātou te tohu whenua nei a Takrouna. Nā te kaha o te karawhiu mai o ngā pū mōta me ngā pū paku i tino uaua mōrearea ai tā rātou mahi, ā, nō muri mai i te tukunga tuatahitanga, tekau tangata noa te toenga ake o te ope a Manahi, toru tekau kē pea tō rātou nui i te tīmatanga.

I taua wā, e ai ki te kōrero a taku matua, ka puta mai a Te Makawe. Ko Te Makawe he kaitiaki nō konei mō te iwi nei o Ngāti Whakaue, he kaitiaki. Ka kitea e taku pāpā taua kaitiaki nei i te rangi, ko te āhua nei he āniwaniwa. Ko te mahi a te kaitiaki i taua wā hei kaiārahi mō tōku pāpā me wērā atu o te Rua Tekau Mā Waru, i te whīra o ngā maina, tae atu ki te maunga, ka arahina mai e Te Makawe i a rātou mā, kia ora ai rātou kia taea te piki tika, te piki pai i taua maunga nei tae noa ki te wā e tū ai, e huna ai ngā Tiamana me ngā Itāriana.

I te wā i hoki mai ai ngā toa o te Rua Tekau Mā Waru o te B company ki konei ki Tamatekapua nei ka anga atu toku pāpā ki te puke kei muri rā ki Pukeroa, kei runga ake te wāhi tika mō te kaitiaki o Te Makawe, kei reira ia e tū ana – he rākau.

Anā, i reira ka karakia ai tōku matua i runga rā. Nā te mea, nā Makawe i ora ai tōku pāpā i te Pakanga Tuarua.